爆陳浩南首選非鄭伊健 王晶：他也不喜歡演陳浩南
出版日期: Tuesday, October 15, 2024
文本大小:
王晶導演近期開設youtube頻道《王晶笑看江湖》主持清談節目，當然少不了大爆影圈秘聞。近期王晶提到他有份監製、九十年代風靡一時的《古惑仔》系列電影，晶哥表示因陳浩南一角人氣登頂的鄭伊健，原來當年並非首選演員。而且王晶還認為《古惑仔》系列一位男角演出力壓鄭伊健，又大爆鄭伊健並不喜歡演陳浩南。
《古惑仔》主角陳浩南原定人選原來有三個，分別是劉德華、何家勁及任達華
王晶憶述當年將港漫《古惑仔》改編成電影，首先要搵演員飾演主角陳浩南，當年晶哥心目中的三甲人選是劉德華、何家勁及任達華，但就認為任達華年紀比陳浩南角色設定稍大。王晶盤算過片酬、檔期等因素之後，決定起用當時同晶哥簽咗多部戲而要還片約嘅鄭伊健演陳浩南。
結果《古惑仔》大受歡迎，鄭伊健人氣有增冇減，王晶形容當時伊健係爆出來的大紅星。
「幾乎將劉德華壓到氣都冇得唞，嗰段日子佢幾乎超越劉德華」，當年自組公司嘅晶哥甚至話當時劉德華有幾套戲不太賣座，他要回去向華盛嘅永盛娛樂幫劉德華拍《龍在江湖》催谷。但王晶同時指伊健原來不喜歡演陳浩南，甚至抱怨過因為演陳浩南而形象負面。
王晶同時大爆當年香港政府打算搵鄭伊健做代表香港形象大使，但因為《古惑仔》一片而告吹。一同主持節目嘅王晶女兒王子涵對此不以為然，認為鄭伊健「佢食呢條水（《古惑仔》）食到而家喎」，王晶就說「直頭養咗佢一世啦」，節目中又以陳小春因山雞一角走紅後，唱親《友情歲月》都開心的態度作對比。
王晶對張耀揚讚不絕口
而喺另一集節目，王晶對於喺《古惑仔3之隻手遮天》演烏鴉、《97古惑仔：戰無不勝》演耀揚的張耀揚讚不絕口，形容張表現非常之出彩，「因為佢本身又高大，又幾靚仔，又健碩，係完全可以壓住鄭伊健，俾到鄭伊健好大壓力」。
